درس: كيف تدرس بالتوجيهي.

                                                           بسم الله الرحمن الرحيم
اما بعد طريقة الدراسة للتوجيهي:

نصائح للطلاب اللي طالعين على التوجيهي
والنصائح مقدمة من الصديق العزيز ضياء معالي -توجيهي سابق وحاصل على معدل بالتسعينات ما شاء الله - .. :
التوجيهي…هي من أجمل السنين التي ستقضيها - في المدرسة طبعا مش بالبيت:D – انا ما صدقت هالكلام الا لما صرت توجيهي وراح تشوفوا , هي سنة مش " خرافية " زي ما بتسمعوا, المواد بتصير أصعب شوي عن الأول ثانوي يعني زي ما بترتفع من أي صف… سأقدم لكم في هذه المقالة نصائح والمشاكل قد خبرْناها نحن طلاب التوجيهي من خلال السنة و أتمنى أن يستفيد منها الجميع.

أولا, التوجيهي مشكلته مش بصعوبة المواد مشكلته انه كيف أنا اللي ما كنت أفتح كتاب الا وقت الامتحان بالسنين الماضية أصير أدرس 4-5 ساعات باليوم؟؟ هاي من أهم المشاكل التي ستواجهك انت طالب التوجيهي, عليك أن تتحلى بال "حماس" أولا لكي تتغلب على هذه المشكلة, فاذا من أولها كنت متذمر و مش قادر تتصور الدراسة فراح تتغلب لتتعود, في بداية السنة لا ترهق حالك بالدراسة, ابدأ بالتدريج فمثلا أول شهر خلّي معدل دراستك 2-3 ساعات باليوم وصير زيد معدل الدراسة كل ما تمر عدة أسابيع ولازم تخلي موعد الدراسة في وقت معين فاليوم لانه بهاي الطريقة راح يتعود العقل انه بالساعة الفلانية وقت دراسة فسيتأقلم مع الزمن ويجب التنويه على أخذ قسطا من الراحة لكل ساعة دراسة فقد أثبتت التجربة أنه لا يمكن الحفاظ على التركيز العقلي لفترة طويلة ... و لتحقيق المذاكرة الفعالة يجب أخذ فترات راحة قصيرة بعد كل ساعة عمل ، و الهدف من فترة الراحة التى لا تتجاوز خمس إلى عشر دقائق تهدئة و إراحة الطالب بعد تجاوز حمل دراسي ويجب على الطالب ألا يستسلم بسهولة و خصوصاً فى الأسابيع الأولى التي يعود فيها الفرد نفسه على عادات معينة.

ستمر خلال دراستك بـ 3 مراحل رئيسية وهي 1- الرغبة العالية في الدراسة 2- الحالة العادية 3- عدم الرغبة في الدراسة, سنبدأ بأول حالة و هي نادرة قليلا ‏‎tongue‎‏ رمز تعبيري راح تيجيك أوقات بتكون نفسك مفتوحة كثير على الدراسة وهي نادرة قليلا… في هاي الحالة حاول انك تأجل كلشي مثل الأكل وخليك ادرس لأنه راح تنجز اشي خرافي و انت مبسوط ومش زهقان فراح تكون فرصة لا تعوض فاغتنمها^_^, أما الحالة الثانية فقد تكلمنا عنها سابقا, وأما الحالة الثالثة فهي تنقسم الى ثلاثة أقسام أولها الزهق العادي وللتغلب عليها عليك بتحديد مادة من موادك الدراسية بتكون بتحبها كتير و بتستمتع – شوي – وانت بتدرس فيها هاي الطريقة بتساعدك على القضاء على هذا النوع من الملل (بتفتح نفسك شوي عن الدراسة بعد ما تدرسها وهيك برجع وضعك طبيعي), القسم الثاني فهو ملل أعلى درجة من القسم الأول وللتغلب عليها بتترك كلشي بايدك من دراسة وبتروح تعمل كلشي بتستمتع فيه وبتحبه لمدة ساعتين و راح تلاحظ بعد هدول الساعتين رجع وضعك للقسم الأول و ذكرنا كيف نتغلب على القسم الأول, وأما القسم الثالث فهو " الأسخم " بينهم ‏‎grin‎‏ رمز تعبيري اللي بتكون مش طايق الدراسة ولا طايق تحكي مع حد و نفسك مسكرة باختصار بتكون بحالة كآبة وهي نادرة وللتغلب عليها عليك ترك الدراسة لمدة يوم كامل وعدم التفكير بها بتاتا, بتغير أواعيك و بتنزل تتمشى بالشارع لمدة ساعتين على الأقل - بدون ما يكون معك حدا- وبعد ما ترجع على البيت خدلك "دش" سريع و ارتاح وبعديها بتصلي ركعتين لربنا بتدعي فيها ربنا انه يشيل عنك هالحالة وترجع عطبيعتك وبعديها روح اسمع قران بصوت شيخ بتحبه بانصات كامل وان شاء الله باليوم اللي بعديه راح ترجع أحسن من أول ( جميع هذه الحلول فعالة ومجربة ).

وبالنسبة للدراسة أوعى انك تعجق حالك بأكثر من دوسية أدرس من استاذ واحد فقط لأنه هيك انت بتعجق حالك …وبالنسبة لمواد تخصص في أساتذة بعرضوا عضلاتهم ببعض الأسئلة بتكون صعبة جدا و ما بيجي زيها بالوزارة بس عشان يعطي لحاله شهرة والطالب المغفل بصير يلحق ورا هيك أستاذة (لأنه بفكر استاذه ما أعطى كلشي بالحصة عشان هيك ما عرف يحل هاي الأسئلة), حاول و انت تدرس يكون معك أسئلة الوزارة عشان يكون عندك تصور كامل عن الأسئلة اللي بتيجي بالوزارة ولا تأجل أي اشي مش فاهمه لبعدين يعني أي اشي بتشوف حالك ضعيف فيه على السريع بتسأل استاذك بالمدرسة أو بالمعهد عنه بدون تأجيل… ومن ناحية المواد اللي بدها حل, حل السؤال لاخر اشي لا تحكي ما أنا عارف كيف بقية الحل لأنه كثير طلاب بغلطوا بالخطوات الأخيرة بالحل في الامتحان وهي بتكون أتفه خطوة أصلا, أما بالنسبة للثقافة العامة - محبوبة الطلاب جميعا xD- فهاي بالنسبة الي كانت من أصعب المواد – علما انه أنا طالب علمي – وبس الاشي الحلو انه الامتحان تاعها مافي لف ودوران سهل نسبيا…وسأقدم بعض النصائح للتخلص من قرف هاي المادة أولا عليك بتخصيص 3 أيام لدراستها ويوم واحد لمراجعة ما درسته كل أسبوع ويفضل تخصيص فترة الصباح – بعد صلاة الفجر – وهي تقريبا ساعتين انك تدرس فيها ثقافة لأنه من الناحية النفسية تؤكد الدراسات والأدلة أن الدراسة فى الصباح الباكر تفيد غالبية الطلاب أكثر من أى فترة أخرى ، حيث يكون الذهن خلال فترة الصباح متيقظاً و نشطاً للغاية وهيك راح ترتاح و انت تدرس فيها بدون غلبة ويفضل أن يكون اليوم لمراجعة ما درسته بالثقافة بيوم عطلة يعني يوم الجمعة مثلا اصحى الصبح وراجع اللي درسته لمدة 3-4 ساعات صباحا عشان تترسخ المعلومة اللي حفظتها براسك و ما تنساها وأوعى تأجل دراستها لأنه راح تندم ندم شديد لاحقا xD
وهاي بعض النصائح المتعلقة بحياتك خلال الدوام:-

- لا تصدق أي واحد بحكيلك انه ما بفتح كتاب وقت التوجيهي وبالذات اللي بتعرف انهم كانو شاطرين بالسنين الماضية لأنهم هدول بخافوا من الحسد فلا تركن
- حاول ابعد عن المشاكل وال " مداقرة " بينك وبين صحابك لأنه راح تأثر عليك لا اراديا وبشكل غير مباشر
- اسمع لنصائح الأستاذة بالنسبة للدراسة لأنه عندهم خبرة كبيرة لا تقدر بثمن
- خلي امك تدعيلك دائما بالصلاة وارضيها لأنه رضا الأم = رضا الله = راح تتوفق بحياتك ودراستك
- لا تتقرب من الله فقط في التوجيهي بل اجعلها عادة لك لبقية حياتك
- تذكر دائما حجم الفرحة اللي راح تكون بوجه أهلك لما تجيب معدل عالي ( حافز مهم للدراسة)
- باختصار قد ما بتدرس بتجيب معدل يعني مافي حد بدرس منيح و بجيب 80

وأخيرا, أسأل الله رب العرش العظيم أن يوفقكم جميعا في هذه السنة وأن يرزقم كما تتمنون وأكثر من الدرجات العالية…محبكم ضياء معالي - طالب توجيهي سابق- ^^